المتابعون للمدونة

الأحد، 3 أبريل 2016

عادية جدا


عادية جدا 

عادية جدا
حلوة زي بنات كتير
وعنيها فتنة وشَعرها زي الحرير
وخدودها ورد وضحكها بيغني زي فراش يطير
بنوتة ناعمة حلوة طعمة ومشيها زي العبير
واللي يشوفها يصير أسير
عادية جدا أصلها
والعادي إني أحبها
وأحلم وأدوب وأعشق وأغير
وأموت عليها بلهفتي لكنّي بعشقها بضمير
عادية جدا منها ف الدنيا كثير
لكن أكيد العادي مش ثقافتها ودماغها الكبير
سهل الأميرة تكون جميلة
لو تبقى عاقلة دا شيء خطير
والصعب جدا إنها تفضل تحافظ ع الأنوثة
بدون ما تبقى مقفّلة زي الغفير
بتعدي نسمة موردة
أنوثتها مش متمردة
مش ع النكد متعودة
وبجد دا إنجاز كبير 
 
الحلوة إللي مش عادية
الفاهمة إللي مش غبية
الواثقة إللي مش هفيّة
أخلاقها من فطرة نقية
هادية ورقيقة ولسة أنوثتها بخير
والعادي جدا لو راجلها معاها حس أنه أمير
ودي بنت فعلا مش عادية واللي زيّها مش كتير! 

محمد حمدي غانم
30/3/2016 

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

صفحة الشاعر