المتابعون للمدونة

الاثنين، 14 مارس 2016

ما بتندميش؟!


ما بتندميش؟! 

ما~ بتغِريش؟
لما الحمام يعشق، يغازل، يبني عشه
وانتي عايشة ما بتعشيش؟ 

ما بتزعليش؟
لما السما تحضن قمرها ف ليل سهرها
وانتي بين حضني مفيش؟ 

ما بتندميش؟
على حب من عشرين سنة مستني يسقيكي الهنا
بس انتي حالفة ما تعشقيش؟ 

وما تعرفيش؟
إني خلاص مش عايزك الوقتي تحبيني
الكون دا مش هيساع حنيني
أنا حبي ليكي حب ليا وحب ليكي يكفي إنك غصب عنك تعشقيني
ولوحده كافي إنه يحضنا سوا مليون سنة ومينتهيش 

ما بتسمعيش؟
كلمة بحبِّك قلتها وبأعلى صوتي
وف شِعري وف ضحكي وسكوتي
وف كل نسمة بَعتّها والورد كاتبلِك رسالة بعطره فيها،
تناجي شَعرك
وتدوب ف أنفاسك
وتجري ف نبضة تسكن بين مشاعرك
وتمس خدك
وأما تبتسمي ف لحظة لذكرياتي يبوس شفايفك طعم توتي
فيغني موجك بين شطوطي
أيوا انتي حاسة ما تنكريش!
طب ليه بقى ما بتقبليش؟
وانتي اللي من غيرك ما ليش 

محمد حمدي غانم
13/3/2016

 

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

صفحة الشاعر