غضـــب
مانا دلعتِك
أحلى كلام ملهوف سمّعتك
مِلكك قلبي وروحي بتاعتك
أيوة أنا بغرورك متّعتك
ما هو لو كنت بكفي رزعتك
ولا زهقت وجيت ودّعتك
للوحدة المُرّة قوام بعتك
ولاّ انا من غيرتك ولّعتك
وفْ شر عمايلك وقّعتك
كنتي سهرتي تبصي ف ساعتك
تدعي عليا عشان دمّعتك
تكذبي على نفسك ببراءتك
تتهميني بأني خدعتك
وبإني بمرّر أيامك
وبإني ف وهمك ضيّعتك
وبأنك مسكينة معايا
وانا مجرم شرير لوّعتك!
لا يا ملاكي، إلعبي غيرها
واضحة خلاص اللعبة بتاعتك
وإياكي تاني تتحديني
فوقي وإلا بهجري وجعتك
أنا أقدر أمحيكي ف لحظة
زي ما في الشعر أنا أبدعتك
أيوة يا ساذجة، ما بتهددشي
آخرك بالونة، وفرقعتك!
عايزة تروحي لواحد غيري؟!
هوّ انا يعني يا روحي منعتك؟!
يلا قوام انسي اللي ما بينا
آسف إني ف يوم صدّعتك!
محمد
حمدي غانم
1/3/2016
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.